എറണാകുളം:ആലുവ തോട്ടക്കാട്ടുകരയിലെ ഫ്ളാറ്റില്‍ ‍കഴുത്തില്‍ കുരുക്കിട്ട് മരിച്ച നിലയില്‍ കണ്ടെത്തിയ രമേശ്, മോനിഷ എന്നിവരുടെ മരണത്തിന് യുവതിയുടെ മൃതദേഹം പെരിയാറില്‍ കണ്ടെത്തിയതുമായി ബന്ധമുണ്ടോ എന്ന സംശയത്തിൽ അന്വേഷണ സംഘം . രണ്ടു മരണങ്ങൾക്കുമിടയിൽ പൊതുവായ ചില ഘടകങ്ങളുണ്ടെന്നാണ് നിഗമനം.

രമേശും മോനിഷയും ഏതാണ്ട് ആറു മാസത്തിലേറെയായി ഒരുമിച്ചായിരുന്നു താമസം. ഇത് വ്യക്തമാക്കുംവിധമുള്ള വിഡിയോകളും മറ്റ് തെളിവുകളും പൊലീസിന് ലഭിച്ചിട്ടുണ്ട്. വടക്കാഞ്ചേരി സ്വദേശിയായ രമേശ് അവിവാഹിതനാണ്. വിവാഹിതയും രണ്ട് കുട്ടികളുടെ അമ്മയുമായ മോനിഷയുടെ സ്വദേശം തൃശൂരും. ചില പരസ്യചിത്രങ്ങളുടെ നിര്‍മാണമാണെന്നാണ് ഫ്ളാറ്റ് വാടകയ്ക്ക് എടുക്കുമ്പോള്‍ ഇവർ പറഞ്ഞിരുന്നത്. എന്നാല്‍ ആത്മഹത്യക്കുള്ള കാരണം വ്യക്തമല്ല.

അതുകൊണ്ട് തന്നെ കൂടുതല്‍ അന്വേഷണത്തിലാണ് പൊലീസ്. മോനിഷയുടെ ഫോണില്‍ ബന്ധപ്പെട്ടിരുന്ന ഒട്ടേറെ പുരുഷ സുഹൃത്തുക്കളെ വിളിച്ചുവരുത്തി ചോദ്യം ചെയ്തുവരികയാണ്. ഇതിനൊപ്പമാണ് എട്ടുമാസം മുന്‍പു പെരിയാറില്‍ യുവതിയുടെ മൃതദേഹം കണ്ടെത്തിയ കേസുമായി ബന്ധപ്പെടുത്തി അന്വേഷിക്കുന്നത്.

പെരിയാറിൽ മരിച്ച നിലയിൽ കണ്ടെത്തിയ യുവതി ആരെന്ന് ഇനിയും തിരിച്ചറിഞ്ഞിട്ടില്ല. എന്നാല്‍ ഏറെക്കുറെ സമാനമായ വിധത്തില്‍ പുറത്തറിയാത്ത വിധം ചില ഇടപാടുകളില്‍ ഇവരും ഏര്‍പ്പെട്ടിരുന്നതായി പൊലീസ് സംശയിക്കുന്നുണ്ട്. ഇതു സംബന്ധിച്ച വിവരങ്ങള്‍ ലഭിച്ചതായാണു സൂചന. കാണാതായി ഇത്ര നാളായിട്ടും യുവതിയെ അന്വേഷിച്ച് ആരും വരാത്തതും പരാതിയൊന്നും ഉണ്ടാകാത്തതും ഇതു കൊണ്ടൊക്കെയാണെന്നാണു നിഗമനം.

ഇപ്പോള്‍ മരിച്ച രമേശും മോനിഷയും ആലുവയില്‍ പെരിയാറിന്റെ തീരത്തെ ഒരു വീട്ടിൽ താമസിക്കുന്ന സമയത്ത് തന്നെയാണ് പെരിയാറിന്റെ തീരത്തെ വിന്‍സെന്‍ഷ്യന്‍ ആശ്രമത്തോട് ചേര്‍ന്ന കടവില്‍ നിന്ന് യുവതിയുടെ മൃതദേഹം കണ്ടെടുത്തത് . ഇതിനു തൊട്ടടുത്ത ദിവസങ്ങളില്‍ അവര്‍ താമസം മാറി. അങ്ങനെയാണ് ഒടുവില്‍ താമസിച്ച ഫ്ളാറ്റില്‍ എത്തിയത്. വെള്ളത്തില്‍ പൊങ്ങുമ്പോള്‍ യുവതിയുടെ മൃതദേഹം പൊതിഞ്ഞിരുന്ന ബ്ലാങ്കറ്റ് കളമശേരിയിലെ കടയില്‍ നിന്ന് വാങ്ങിയത് ഒരു പുരുഷനും സ്ത്രീയും ചേര്‍ന്നാണെന്ന് കണ്ടെത്തിയിരുന്നു. ഇവരെ നേരത്തേ തിരിച്ചറിഞ്ഞതായി പൊലീസ് പറയുന്നുണ്ടെങ്കിലും പുതിയ സാഹചര്യത്തില്‍ രമേശിന്റെയും മോനിഷയുടെയും മരണവുമായി ബന്ധപ്പെടുത്തി കാര്യങ്ങള്‍ പരിശോധിക്കുന്നതായാണു വിവരം.

Loading...